قصيدة جايز تأليف أحمد خير الله
قصيدة جايز تأليف أحمد خير الله

جايز


جايز نتلاقى بأرواحنا فى الليل
المعجون بالضلمة
و ندردش سوا على صوت الوحدة
اللى بيزرع فى صداه الصمت
جايز يبقالنا معاد تانى
فوق نغمة عود سيد درويش
نبعت اصواتنا لآخر الوادى
تروح متجيش 
و نعيش على رنة شيخنا امام
بيغنى البحر بيضحك ليه
طب ليه البحر مضحكنيش؟!
جايز نتقابل ف الملكوت
طايرين بسكوت
من غير الحزن ما يلمحنا
من غير ما عيون الكون فجأة
نضحك نلاقيها تدمعنا
من غير ما فراقنا يسمعنا
الحانه الدايبة من الاحزان
يسند ع القلب ف يوجعنا
فنسب و نلعن فى الالحان
جايز نتكعبل ف الدنيا
و نقوم واقعين
على كم قميص الكون كلة
قاعدين ع القمرة بنتشمس
و نوقع كل نجوم السما برموش العين
فتقوم مبدورة على الجنبين
فتافيت الملح فى كتب كتاب
مرشوش ف وشوش كل الحاسدين
جايز نتفارق دلوقتى
لكن احلامنا هتتقابل
فوق ضهر الدهر المش قابل
يسقينى الفرحة بكف الايد
لــ / أحمد خيرالله